15ta xorijiy oliygoh talabasi bo‘lgan o‘quvchi bilan suhbat


Shahzoda Hamidova hali 18 yoshdaligiga qaramay, tengqurlari havas qilsa arziydigan muvaffaqiyatlarga erishgan. U turli xorijiy davlatlardagi 28ta oliy o‘quv yurtiga hujjat topshirib, allaqachon ularning 15tasida talaba bo‘lishga erishdi. Eng qizig‘i, bu hali hammasi emas.

«Internetdagi Common Application platformasi orqali 28ta universitetga hujjat yuborganman. Oliygohlar elektron pochta orqali qayta aloqaga chiqishdi. Matematika bo‘yicha SAT va til darajasini ko‘rsatuvchi IELTS bo‘yicha natijalar so‘raladi. Motivatsion xat, o‘qituvchi va rahbarlaringizdan tavsiyanoma, o‘rta ta'limdagi baholaringiz haqida ham ma'lumot yuborishingiz kerak bo‘ladi. Shu ko‘rsatkichlar asosida sizni talabalikka qabul qilishadi», — deydi Shahzoda.

Shahzoda Hamidova hozirda Toshkent irrigatsiya va qishloq xo‘jaligini mexanizatsiyalash muhandislari instituti qoshidagi International House Tashkent akademik litseyining 3-bosqich o‘quvchisi. U huquq sohasida tahsil olmoqda, keyingi ta'lim jarayonini ham aynan xalqaro yurisprudensiya bilan bog‘laydi.

«Hali qaysi universitetni tanlash bo‘yicha bir qarorga kelganim yo‘q. Lekin AQShning Massachusets shtati Boston shahridagi oliygohlardan birini tanlashni istardim. Boston — chin ma'nodagi ta'lim va talabalar shaharchasi», — deydi bo‘lajak huquqshunos.

Shahzoda faqatgina xorijdagi bakalavr ta'limi bilan cheklanib qolmoqchi emas.

«Bakalavr ta'limini bitirgach, magistraturani Harvard universitetining yuridik maktabida davom ettirishni o‘z oldimga maqsad qilib qo‘yganman», — deydi u o‘z rejalari haqida gapirar ekan.

Shahzoda uchun oliy o‘quv yurtiga kirish shunchaki talaba bo‘lishni anglatmaydi.

«Bu eng avvalo yaqin insonlarning ishonchini oqlashdir. Onamning, oila a'zolarimning ishonchini oqlash, litseydagi ustozlarim yaratib bergan sharoitga munosib bo‘lish istagi meni izlanishga undardi. Talaba bo‘lishni istagan odam avvaldanoq universitetlar haqida ma'lumotlarni yig‘ib borishi kerak. Eng muhimi, maqsad faqatgina xorijga borib, u yerda qolib ketish havasi emas, balki nimanidir o‘rganib qaytib, yurtga juda kichkina bo‘lsa ham nimadir bera olish bo‘lishi lozim», — deb hisoblaydi u.

IELTS tizimida 7.0 natija ko‘rsatgan Shahzoda ingliz tilini o‘rganishdagi o‘z «layfhak»lari bilan ham bo‘lishdi. Uning fikricha, har qanday tilni o‘rganishda shu tilga mehr qo‘yish, uni o‘rganish osonligiga o‘zini ishontirish muhim.

«Men ingliz tilida juda ko‘p video ko‘raman. Shunda quloq begona tilga moslashib, o‘rganib boradi. Eng muhimi, ingliz tilida gapirishdan qo‘rqmaslik kerak. Qo‘rqqan odam tilni o‘rgana olmaydi. Xato bo‘lsin, to‘g‘ri bo‘lsin, gapiraverish kerak. Hech bo‘lmaganda, o‘z o‘ziga kundalik voqealarni gapirib berish ham mumkin», — deydi Shahzoda.

Saodat Abdurahmonova suhbatlashdi

Manba: kun.uz