Kollej va texnikumlarda o‘qish 7 fevraldan boshlanadi


Professional ta’lim muassasalarining aksar o‘quvchilari o‘z hududida yashagani sabab ularda an’anaviy ta’lim 7 fevraldan boshlanadi.

Professional ta’lim muassasalari – texnikum, kollej, kasb-hunar maktablari va litseylarda o‘quv jarayonlari 7 fevraldan an’anaviy shaklga o‘tkaziladi. Bu haqda Oliy va o‘rta maxsus ta’lim vazirligi matbuot xizmati ma’lum qildi.

Vazirlikning izohlashicha, ushbu ta’lim muassasalarida o‘quvchilarining deyarli barchasi o‘z hududida istiqomat qiluvchi fuqarolar bo‘lgani ularning darslarda ishtirok etishida ortiqcha qiyinchiliklar keltirib chiqarmaydi.

Eslatib o‘tamiz, 7 fevraldan umumta’lim maktablari, professional, kasb-hunar ta’lim va oliy ta’lim muassasalari, akademik litseylar, nodavlat ta’lim tashkilotlarida o‘quv jarayoni an’anaviy shaklga o‘tkazilishi e’lon qilingandi. Bunda OTMlar 7 fevraldan 24 fevralgacha bosqichma-bosqich an’anaviy shaklga o‘tkazilishi ko‘zda tutilgan.