Shavkat Mirziyoev: “Diniy maktab va madrasalar tashkil etiladi”


O‘zbekiston Respublikasi Prezidenti Shavkat Mirziyoev 20 fevral kuni Anqara shahrida Turkiya Respublikasi Prezidenti huzuridagi Xalq kutubxonasining ochilish marosimida ishtirok etdi. Ushbu kutubxona Turkiya rahbari Rejep Tayyip Erdog‘an tashabbusi bilan bunyod etilgan, deb yozadi Azon.uz.


Ochilish marosimida butun dunyodan ikki mingga yaqin mehmon - olimlar, yozuvchilar, ta’lim va madaniyat namoyandalari, davlat va jamoat arboblari qatnashdi. Shavkat Mirziyoev Turkiya Prezidenti tomonidan taklif etilgan oliy darajadagi yagona mehmon bo‘ldi.

- Aziz qardoshlar, biz ilmiy ma’rifatni keng ma’noda tushunamiz va shu sababli yurtimizda dunyoviy ta’lim dargohlari bilan birga diniy maktab va madrasalar, ilmiy-ma’rifiy markazlar tashkil etilmoqda. Xususan, Toshkent shahrida ko‘p asrlik ma’rifat xazinasini o‘zida mujassam etadigan Islom sivilizatsiyasi markazini bunyod etmoqdamiz. Samarqandda Imom Buxoriy, Surxondaryoda imom Termiziy nomlaridagi xalqaro ilmiy tadqiqot markazlari faoliyat olib bormoqda. Ularda boshqa fanlar qatorida, hadis, kalom, aqida, tasavvuf, fiqh ilmini chuqur o‘rganilmoqda, - dedi Shavkat Mirziyoev.